နိုင်ငံအမြောက်အမြား၏ လွှတ်တော်များတွင် အမျိုးသမီးများ၏ ညီလာခံဟုခေါ်သည့် - အမျိုးသမီးလွှတ်တော်ကိုယ်စားလှယ် များ ကွန်ရက် ရှိပါသည်။ နိုင်ငံရေးပါတီအသီးသီးမှ အမျိုးသမီးလွှတ်တော်ကိုယ်စားလှယ်များ အားလုံးသည် အမျိုးသမီးများ အနေဖြင့် ၎င်းတို့နှင့် သက်ဆိုင်သည့် အကြောင်းအရာများကို လေ့လာရန် စုစည်းတွေ့ဆုံကြပါသည်။ ဥပမာ - အရပ်ဘက် လူမှုအဖွဲ့အစည်းမှ တစ်စုံ တစ်ယောက်သည် ညီလာခံ အစည်းအဝေးသို့ လာရောက်ကာကုလသမဂ္ဂ လုံခြုံရေးကောင်စီ၏ ကြေညာချက် ၁၃၂၅ - အမျိုးသမီး၊ ငြိမ်းချမ်းရေးနှင့် လုံခြုံရေးအကြောင်းကို ပြောကြားသည်။ ထို့နောက် အမျိုးသမီး လွှတ်တော်ကိုယ်စားလှယ် များက ဆွေးနွေးကာ ၎င်းတို့အဖွဲ့ဝင်ဖြစ်နေသည့်လွှတ်တော်အနေဖြင့် ပဋိပက္ခအတွင်းမှ အမျိုးသမီး များ၏ ထိခိုက်ခံစားရမှုများအား မည်သို့ ဖြေရှင်း ဆောင်ရွက်ပေးနိုင်မည်နှင့် အမျိုးသမီးငြိမ်းချမ်းရေး ကိုယ်စားလှယ်များ တိုးမြင့် လာစေရေးအတွက် မည်သို့ ဆောင်ရွက်နိုင်မည်ကို စဉ်းစားကြပါသည်။

သင့်လွှတ်တော်ထဲတွင် အမျိုးသမီးများ၏ ညီလာခံ ရှိနေနိုင်ပါသလား? ညီလာခံအနေဖြင့် အမျိုးသမီးများ၏အခြေအနေ တိုးတက်လာစေရေးအတွက် ရည်မှန်းချက်ပန်းတိုင်များ အောင်မြင်စေရန်နှင့် မူဝါဒများရေး ဆွဲနိုင်စေရန်အလိုရှိသည်ဆိုပါက အရေးကြီးသည့်အချက်မှာ ဖြေရှင်းဆောင်ရွက်ရမည့် ကိစ္စရပ်များကို ဖော်ထုတ်ပြီး သင်တို့အားလုံးသဘောတူနိုင်မည့် မူဝါဒများအကြောင်း ပြောကြားရန်ဖြစ်ပါသည်။ သင်တို့အားလုံးက ကျား၊ မ အခြေပြု အကြမ်းဖက်မှုသည် ကြီးမားသည့် ပြဿနာတစ်ရပ်ဖြစ်သည်ဟု ယူဆပါက ထိုအရာကို တိုက်ဖျက်နိုင်သည့် မူဝါဒတစ်ခုကို သဘောတူနိုင်ပါသည်။ ၎င်းသည် ဥပဒေပြုပြီးဖြစ်သလား၊ အမျိုးသမီးရဲဝန်ထမ်းများ ပိုမိုခန့်ထားသလား၊ အကြမ်းဖက်ခံရသူကိုအကူအညီပေးသည့် ရဲများ၊ တရားရေးကဏ္ဍမှ တာဝန်ရှိသူများနှင့် လူမှုဝန်ထမ်းသမားများအား သင်တန်းပေးထားသလား၊ အမျိုးသမီးများ အတွက် နားခိုရန်နေရာများ၊ ဥပဒေနှင့် ကျန်းမာရေးဝန်ဆောင်မှုများ ရှိသလား သို့မဟုတ်သတင်း အချက်အလက်ပေးရန် လှုပ်ရှားမှုများ စတင်မလား။ ညီလာခံတွင် အားလုံးအတူတကွ ဆွေးနွေးပြီးသည့်နောက်သင်တို့ တစ်ဦးချင်းစီသည် အဆိုပါအကြောင်း အရာအား မိမိတို့၏ သက်ဆိုင်ရာ ပါတီသို့ယူဆောင်သွားပြီး ပြဿနာကိုဖြေရှင်း ဆောင်ရွက်နိုင်ရန်အတွက် လိုအပ်သည့် ဆောင်ရွက်မှုများ လုပ်ဆောင်နိုင်ရန် ဆွေးနွေးမှု စတင်နိုင်ပါသည်။